Phir Jane Kyu Diya

Ek sawal pooncha tha tumne cheh mahine ke baad
Abhishek Mishra, ab kaise aa rahi hai meri itni yaad
marr kyu rahe ho, jeete kyu nahi
jate kyu nahi, wahin jahan the mujhse door?

nahi tab to bade aaraam se pooncha tha
chillaya to shor poore ghar mein goonja tha
jaa rahi hoon man karta hai mere ashiq
ab nahi rehna tumhare paas smjhe ki koshish
to karo, kya dekh rahe ho neeche
dekho meri aankhon mein, inke peeche
ek darr hai jo mujhe satata hai
bhata hai mujhe tumhara chehra kitna bhata hai
din nahi kat-ta, raat mein roti hun
tum to jante ho babu, aajkal main kahan soti hoon?

kaash tumne mujhe dhoka diya hota to kitna aasaan hota
chhod deti tumhe aur dard bhi na hota
par inn bechain ankhon ko iss acche aadmi ko
gale se laga ke rakh loon ye chahti hooon
zindagi jhand hai, tumse pyar ka ghamand hai
par saath nahi hai
jaan hamari itni aukat nahi hai
ki tumhara-mera saath ho, ek ghar ho usme apne ho
main tassali se tumhari god mein baithun, hamare kuch sapne ho
jo ham poore kar paye
par main yahan rehti hoon tumse kitna door
hamare baaton ke kharche beshumaar
to inke charche saareaam hain
poora din jab thak jati hoon to tumko waqt nahi de paati
ehsaas-e-jurm ki saza kya hai
ae ghalib, akhir iss dard ki dawa kya hai?

tum bhi har din uthke milon chale aate ho
aadha din meri ek jhalak ke liye bitate ho
mere dost tumhe pagal kehte hain
aur main tumhare layak nahi hoon janti hoon
to chale jao, ye kehti hoon -
kyunki padh likh bhi nahi pati hoon,
dekho kitni bekar hoon
maa baap ki bechaini, unki takleefon ka kirdar hoon
mujhe isse faana kar yehi maangti hoon
failati hoon apna daaman, tere saamne sar jhukati hoon
ab kabhi pyar hai mat bolna
theek hai kehke maine gale lagaya tha
mere ashiq tab tu mujhe mere ghar tak chhodne aaya tha
aaya tha na? bol na kuch jawab kyu nahi hai
arre ro deta uss din ek baar to main palat jati
par tujhe to iss baat ka bhi malaal nahi hai shayad teri izzat ghat jati,
haina, arre bol na!!!

bolta hoon jo tu sun nahi paegi
mera dil dukhega jab apna dukhaegi
itna darta hoon tujhe dard dene mein hamnava
iss aag mein maregi nahi par jal zaroor jaegi
par sun kyunki tu katil hai mere wajood ki
meri khushi, meri dillagi mere guroor ki

bhool gayi na, kaise jhuki thi uss din jhukane ke liye
leke aayi thi mohabbat ka farman, hamein bhulane ke liye
tum bhool gayi ki tumne mujhse pyar maanga tha
aur pyar sirf meri ho, meri rehne ka naam nahi hota
pyar jaisi ho jahan ho khush raho kehta hai

kyunki rok leta tumhe to galatfehmi hoti
maine roka to ruk gayi yunhi smjhti
main chahta tha ki tum ruko
par isliye nahi ki maine roka
isliye kyunki tum rukna chahti thi
tumhara pyar duniya ki riwayaton se bada hai
ye dekhna chahta tha
par tum uth gayi chali gayi
arre kis baat par rota ki tum jaa rahi ho
ab uth ke tumhare ghar mohalle ke chakkar nahi katne honge
vo kharche vo baatein meri mujh se hongi
vo khwab bhari raatein mujhi se hongi
arre voi to mujhe chaiye tha, mere armaan the
voi to mera saath rehte saaye ki tarah
har din mujhe uthate the, subah ki chai ki tarah
arre marr raha tha ki tera pyar tujhe rok le
mujhe bolna padega ruk jao to saala pyar kya tha
dillagi kya thi dildaar kya tha
kya banaya tumhe hamare pyar ne
bechain besahara behuda
majboor namanzoor gumshuda

Phir jane kyu diya?
kyunki jaane ki baat par mulakat lagti
uss mulakat ki hasrat mein haan kardi
tumhari khushi jisme lagi uss baat par haan kardi
jab raaton ko main roya to kabhi tumhe bola kya
tumhe pata hai dard kitna hua hoga
par ye imaan dil ke patthar par gada kabhi dola kya?

phir roya bhi nahi, hasta raha
vo hansi ne itna rulaya hai kya bataun
kitna pyar karta hoon aaj bhi kaise jataun
tum utni hi ho mere dil mein meri jitna tab thi
tab bhi kitna thi kya pata kab thi
par iss dard ke liye shukriya, kuch diya hi to liya to nahi
haan iss nashe  ke utarne ka intezaar karunga
isliye nahi ki tum ro jao to mujhe hansi aaye
par isliye ki phir jab punchu ki jane kyu diya
to bata doon, kahan jane diya kahan gayi
yahin to khadi ho aur mujhse poonch rahi ho
Phir jane kyu diya?